Avropada daxili aviareyslərdən istifadə edən insanların sayı azalır, çünki səyahətçilər daha ekoloji variantlara üstünlük verirlər.

Görünür flight shame – “aviauçuşlara görə utanc" – həqiqətən də mövcuddur. Bu, ən azından ölkə daxilində qısa məsafələrə aiddir.

Avropa Hava Naviqasiyasının Təhlükəsizliyi Təşkilatının yeni məlumatına görə, 2019-cu illə müqayisədə 2022-ci ildə Almaniyada daxili reyslər 38 faiz azalıb. Litva və Finlandiyada onların sayı müvafiq olaraq 38 faiz və 35 faiz azalıb.

AZƏRTAC “Euronews” saytına istinadla xəbər verir ki, Avropa Hava Naviqasiyasının Təhlükəsizliyi Təşkilatının hesabatında deyildiyinə görə, azalma “ekoloji təzyiq” ilə bağlı ola bilər.

Ən böyük azalma Almaniya, Litva və Finlandiyada müşahidə olunub. Qeyd edilməlidir ki, azalma meyli bütün qitədə kifayət qədər davamlı olub.

Böyük Britaniyada daxili aviareyslərin 25 faiz azalması qeydə alınıb. Avstriya (32 faiz), İsveç (27 faiz), İsveçrə (20 faiz), Xorvatiya (19 faiz) və İrlandiya (17 faiz) da daxili aviadaşımaların əhəmiyyətli dərəcədə azalması barədə məlumat veriblər. Fransada bu göstərici 15 faiz, Portuqaliya və İspaniyada isə – müvafiq olaraq 7 faiz və 6 faiz təşkil edib.

Macarıstanda isə daxili reyslərin sayı 2019-cu illə müqayisədə 56 faiz artıb.

Avropa Hava Naviqasiyasının Təhlükəsizliyi Təşkilatı azalmanı “İspaniya, Almaniya və Avstriyanın ucuz dəmir yolu biletləri təqdim etdikləri” ilə izah edir.

Ötən yay Almaniya əhəmiyyətli endirimlə ictimai nəqliyyat bileti tətbiq edib. Bu, səyahət edənlərə ayda cəmi 9 avroya yerli və regional qatarlardan məhdudiyyətsiz istifadə etmək hüququnu verib.