Ölkəmizin, eyni zamanda, paytaxtımızın bir çox guşələrində Yeni il ab-havası yaşanır. Bayramlarla əlaqədar Bakı şəhərinin meydan və küçələri al-əlvan bəzədilib. Bu baxımdan İçərişəhər ən çox ziyarət edilən məkanlardan biridir. Şəhərdə bayramın daha çox qeyd edildiyi məkanların birində fərqli və geniş formada xüsusi proqram hazırlanıb. Müxtəlif Yeni il atributları və rəmzləri, bayram yarmarkası təşkil olunub.

Turaztv.az AZƏRTAC-a istinadən xəbər verir ki, İçərişəhərdə əsl bayram ab-havası yaşanır. Müxtəlif musiqi nömrələri küçələrdə insanların zövqünü oxşayır. Rəngarəng işıqlarla bəzədilmiş meydan və küçə, küknar ağacları Yeni ilin gəlişini göstərir.

Qoşa Qala qapısı meydanında və Qız qalası ətrafında “Sehrli Qala" festivalı keçirilir. Paytaxt sakinlərinə, qonaqlara müxtəlif əyləncəli proqramlar, oyun və musiqi nömrələri, sərgi-satış yarmarkası, həmçinin hər növ suvenir, əl işləri və digər bayram atributları, orqanik məhsullar təqdim edilir. Şənliyin kiçik yaşlı qonaqları üçün xüsusi zonalar ayrılıb ki, burada onlar üçün xüsusi əyləncəli proqramlar təşkil olunub.

Şəhər sakinləri, bölgələrdən gələnlər burada təşkil edilmiş maraqlı konsert proqramını izləyirlər. Onlar yarmarkada müxtəlif mətbəxlərin taamların dadına baxırlar. Ümumiyyətlə, bu məkanda hər şey yüksək səviyyədə təşkil olunub.

Beləliklə, burada hər kəs Bakının qədim koloritini duyur və 2023-ci ili ailəsi, dostları ilə yaddaqalan anlarla qeyd edir.

AZƏRTAC-ın fotomüxbirləri paytaxtımızın Yeni ildə bayram ab-havasının yaşandığı bu bənzərsiz guşədəki maraqlı anları fotolentə alıblar. Həmin görüntüləri təqdim edirik.