Möhtəşəm Zəfərimizlə başa çatan Vətən müharibəsində şərəfli döyüş yolu keçən qəhrəmanlarımız arasında Əmək və Əhalinin Sosial Müdafiəsi Nazirliyinin tabeliyindəki Dövlət Sosial Müdafiə Fondunun (DSMF) əməkdaşları da var. Zəfər Günü ərəfəsində həmin qazi əməkdaşlarla, həmçinin övladı Vətən müharibəsində şəhid olmuş əməkdaşlarla görüş olub. Görüşdə şəhidlərin ruhu bir dəqiqəlik sükutla yad edilib.

Fondun mətbuat xidmətindən AZƏRTAC-a bildirilib ki, DSMF-nin sədri Himalay Məmişov Prezident, Ali Bas Komandan İlham Əliyevin rəhbərliyi ilə 44 günlük Vətən müharibəsində Azərbaycanın qazandığı tarixi Zəfərdən, 30 ilə yaxın Ermənistanın işğalı altında qalmış torpaqlarımızın müzəffər Ordumuzun rəşadəti nəticəsində azad olunmasından bəhs edib.

H.Məmişov Zəfərimizin qəhrəmanlarına təşəkkürünü bildirib və şəhidlərimizə Allahdan rəhmət diləyib.
Sonda Vətən müharibəsində iştirak etmiş DSMF əməkdaşlarına təşəkkürnamələr təqdim olunub, onlara xoş arzular ifadə olunub.