Filologiya elmləri doktoru, professor Vüqar Əhməd “Şəhriyarın fars poeziyasında yeri və mövqeyi” adlı elmi araşdırmasında XX əsr Azərbaycan və İran ədəbiyyatının görkəmli nümayəndəsi Məhəmmədhüseyn Şəhriyarın farsdilli yaradıcılığı geniş şəkildə təhlil edib.

Turaztv.az AZƏRTAC-a istinadən xəbər verir ki, tədqiqatda Şəhriyarın yalnız Azərbaycan və İran poeziyasının deyil, bütövlükdə Şərq ədəbi fikrinin ən qüdrətli simalarından biri olduğu qeyd olunub. Onun yaradıcılığı klassik ənənələrlə müasir poetik düşüncəni uğurla birləşdirərək fars poeziyasının inkişafında mühüm rol oynayıb. Professor Vüqar Əhməd vurğulayıb ki, Şəhriyarın fars dilində qələmə aldığı qəzəl, qəsidə, məsnəvi və digər poetik nümunələr sənətkarlıq baxımından yüksək bədii dəyərə malikdir.

Araşdırmada şairin həm Azərbaycan, həm də fars ədəbiyyatına verdiyi töhfələrdən bəhs olunur. Bildirilir ki, “Əsrin Hafizi” adlandırılan Şəhriyar klassik poeziyanın zəngin irsini müasir dövrün estetik tələbləri ilə uzlaşdıraraq özünəməxsus yaradıcılıq məktəbi formalaşdırıb. Onun əsərləri dünyanın müxtəlif dillərinə tərcümə olunub və geniş oxucu auditoriyasının rəğbətini qazanıb.

Məqalədə Şəhriyarın fars poeziyasında tutduğu mövqe, İran ədəbi mühitinə təsiri, klassik və çağdaş şeir üslublarından məharətlə istifadə etməsi xüsusi qeyd edilir. Müəllifin qənaətinə görə, Şəhriyar ənənə və novatorluq arasında uğurlu tarazlıq yaradaraq XX əsr fars poeziyasının zirvələrindən birini fəth edib.

Professor Vüqar Əhməd vurğulayıb ki, Şəhriyarın farsdilli irsi Azərbaycan ədəbiyyatşünaslığında daha geniş və fundamental şəkildə araşdırılmalıdır. Bu istiqamətdə aparılan tədqiqatlar böyük şairin yaradıcılığının yeni qatlarının üzə çıxarılmasına imkan verəcək.

Məqalədə Şəhriyarın Azərbaycan və İran mədəniyyətləri arasında mənəvi körpü rolunu oynadığı, iki dildə yaratdığı zəngin ədəbi irslə dünya ədəbiyyatında özünəməxsus yer tutduğu qeyd olunur.