BƏHRUZ MƏMMƏDOV


Bu il Xalq Şairinin 89 yaşı tamam oldu. Qarşıdan isə onun 90 illik yubileyi gəlir. Yəqin ki, gələcək aylarda Azərbaycanın hər yerində Musa sevərlərin iştirakı ilə “Musa Yaqub günləri” keçiriləcək, onun poeziyasının işığı yenidən ocaqlardan, məktəblərdən, mədəniyyət evlərindən boylanacaq. Çünki Musa Yaqub yalnız şair deyildi - o, təbiətin nəfəsini insan ruhuna çevirən, dağın, çayın, ağacın, torpağın dilini poeziyada danışdıran bir ruh adamı idi. Onun şeirlərində ilahi hikmətlə təbiət fəlsəfəsi, insan qəlbi ilə kainatın ahəngi bir-birinə qovuşur.
Mayın 15-də İsmayıllının Buynuz kənd məktəbinin təşkilatçılığı ilə keçirilən tədbir də bu ruhun davamı təsiri bağışlayırdı. Tədbirdə qeyd etdiyim kimi, bu görüş əslində Musa Yaqubun 90 illik yubileyinə aparan bir estafet xarakteri daşıyır. Bu estafetin məhz Buynuz kənd məktəbindən başlanması isə olduqca rəmzi və mənalıdır. Çünki həmin məktəbin ilk direktoru Musa Yaqub olub. Şairin elmə, təhsilə, tərbiyəyə və mədəniyyətə verdiyi böyük dəyəri hamı bilir. O, müəllimliyi də şairliyi kimi ürəklə yaşamış, insan yetişdirməyi müqəddəs iş hesab etmişdi.
Mayın 16-da isə İsmayıllı Rayon Mədəniyyət Mərkəzində daha geniş auditoriya üçün təşkil olunan tədbir əsl mənada böyük bir söz və sənət bayramına çevrilmişdi.

Tədbirin bədii tərtibatı xüsusi zövqlə hazırlanmışdı. Müxtəlif kompozisiyalar, aktyor oyunları, şairin öz səsi ilə müşayiət olunan kölgə səhnəsi tədbirə son dərəcə təsirli ovqat qatırdı. Qiraət ustalarının çıxışları, müğənnilərin ifaları, şairin dostlarının xatirələri Musa Yaqubun ruhunu sanki yenidən salona gətirmişdi. Yeni çapdan çıxmış kitabının təqdimatı, foyedə onun kitablarından və şəkillərindən ibarət sərginin qurulması, qəbirüstü abidəsinin ziyarət olunması tədbirə xüsusi bütövlük və mənəvi dərinlik verirdi.
Hiss olunurdu ki, burada sadəcə bir şair yad edilmir. Burada bir ömür fəlsəfəsi, bir təbiət məktəbi, insanla torpaq arasındakı müqəddəs bağ anılırdı. Musa Yaqubun poeziyası həmişə insanı təbiətə yaxınlaşdırıb, təbiəti isə insan ruhunun aynasına çevirib. Bəlkə də buna görə onun misraları illər keçsə də köhnəlmir - çünki təbiətin özü kimi əbədidir.
Bu iki gün bir daha göstərdi ki, Musa Yaqub Azərbaycanın yalnız ədəbiyyat tarixində deyil, xalqın mənəvi yaddaşında yaşayan şairlərdəndir. Onun 90 illik yubileyinə aparan yol artıq başlayıb. Və bu yolun ilk işığı Buynuzdan, şairin müəllimlik etdiyi məktəbdən yandı.