Türkiyənin xarici işlər naziri Hakan Fidan İran–ABŞ–İsrail qarşıdurması fonunda mümkün mənfi ssenarilərin dövlət qurumları arasında müzakirə edildiyini bildirib.

APA-nın Türkiyə bürosunun məlumatına görə, nazir təhlükəsizlik məsələləri ilə bağlı Prezidentə demək olar ki, saatlıq məlumat verildiyini qeyd edib.

“Biz Türkiyə ilə bağlı bütün ssenariləri peşəkar şəkildə, qurumlararası koordinasiya iclaslarında müzakirə edirik. Bu toplantılar sahədə baş verən hadisələrə uyğun olaraq təşkil olunur və hazırda intensiv koordinasiya prosesindəyik”, – deyə Fidan bildirib.

Onun sözlərinə görə, xüsusilə humanitar və təhlükəsizlik məsələləri üzrə mütəmadi koordinasiya görüşləri keçirilir. Milli Müdafiə Nazirliyi və MİT-in iştirakı ilə davamlı təhlükəsizlik qiymətləndirmələri aparılır.

“Prezident bu məsələlərlə bağlı demək olar ki, saatlıq məlumatlandırılır. Zəruri hallarda göstərişlər alınır və təsdiqə təqdim olunan məsələlər müzakirə edilir. Bu, əslində böhran idarəetməsidir. Dövlət və hökumət olaraq belə proseslərə sistemli və hazırlıqlı şəkildə yanaşırıq”, – deyə nazir vurğulayıb.