Keçirilən tədbirdə şəhid ailələri, dəyərli yazıçılar, ailə üzvləri və yaxınları iştirak edirdi. Bu gün təkcə bir doğum günü deyil, həm də bir qəhrəmanın xatirəsinin yaşadıldığı, onun şərəfli ömür yolunun yad edildiyi müqəddəs bir gün idi.

Tədbir boyunca Vasifin keçdiyi şərəfli həyat yolu, Vətənə olan sonsuz sevgisi, qəhrəmanlığı və fədakarlığı haqqında ürəkdən çıxan sözlər səsləndirildi. Onun adı qəlblərdə qürur, gözlərdə həm kədər, həm də fəxr yaşatdı.

Şəhidlər bizim baş tacımızdır. Onların əmanəti olan bu Vətənə sahib çıxmaq hər birimizin borcudur. Vasif kimi igidlərin sayəsində bu gün azad, başıuca yaşayırıq.

Süleymanov Vasif Akif oğlu 2002 ci il fevral ayının 24-ü Qəbələ rayonu Bum qəsəbəsində anadan olmuşdur. Orta təhsilini Qəbələ rayonu Bum qəsəbə orta məktəbində almışdır. Qəbələ rayonunda olan Peşə Məktəbində aşbazlıq bölümündə oxumuşdur. 2020 ci ildə Covid-19 virusu və pandemiya vəziyyəti ilə əlaqədar olaraq həqiqi hərbi xidmətinə aprel ayında deyil, may ayının 8-i getmiş,ordu sıralarında aşpaz olmasını təklif etsələr də , öz istəyi ilə buna razı olmamışdır.Süleymanov Vasif həqiqi hərbi xidmətini Gəncə və Cəlilabadda N saylı hərbi hissədə keçmiş, 2020 ci il 27 sentyabrda başlanan İkinci Qarabağ Müharibəsində iştirak etmiş, bir neçə yerlərin düşmən işğalından azad olunmasında böyük şücaət göstərmişdir. 2020 ci il oktyabr ayının 6-ı Füzuli rayonu uğrunda gedən döyüşlərdə qəhrəmancasına şəhid olmuşdur. Qəbələ rayonu Bum qəsəbəsində dəfn olunmuşdur . SSRİ(Sovet) Ordu sıralarında xidmət edərkən şəhid olan Vasif əmisinin adını daşıyırdı. İki bacının bir qardaşı idi.

Allah bütün şəhidlərimizə rəhmət eləsin. Ruhları şad, məkanları cənnət olsun.
Onların adı daim yaşayacaq, xatirələri isə qəlblərimizdə əbədi qalacaq.

Təranə Alməmmədova
Dünya Azərbaycanlılarının Mədəniyyət mərkəzi İB
Qəbələ rayon nümayəndəliyinin rəhbəri