BRİLYANT QURBANOVA : Şeirlər - FOTO

Xəbərlər

23.02.2026, 20:34

BRİLYANT QURBANOVA : Şeirlər - FOTO

Kimi.

Duyğularım baş-başadır,
Elə yatır quzu kimi...
Kipriklərim göz yaşımı
Yalayır daş duzu kimi.

Yerdən çıxdım, yerin oldum,
Dodaqlarda şirin oldum,
Ürəklərdə sərin oldum,
O dağların buzu kimi.

Tarixim var şanlı, yaşar,
Yaşamağa verdim qərar,
Əyilməyən qürurum var,
Azərbaycan qızı kimi.

Şair sevir hər zamanı,
Bil faydalı sən samanı,
Min bir dərdə əlac hanı
Arıların tozu kimi?

Atəş, girmə söz qəstinə,
Bələnərsən öz tüstünə,
Pozularsan qar üstünə
Həkk olunan yazı kimi.

17.02.2026.

Qalır.

Bir dağın döşüylə sürünür duman,
Nə yolu görünür, nə izi qalır.
İki göz alıbdı Allahdan adam,
Köçəndə arxada çox gözü qalır.

Nə yığsan, nə qursan gəldi-gedərdi,
Geysən ləl-cəvahir, yenə hədərdi,
Sevinci azcadı, çoxu kədərdi
Yaxşısı gizlənir, pis üzü qalır.

Çox alim gizlənib "çovanam" adda,
Ağıl yaşda deyil, nə də savadda,
Min kitab oxuduq, ancaq ki, yadda
Atalar məsəli, el sözü qalır.

20.02.2026.

Vaxtıdır.

Cavanlıqda tək çəkirdim hər yükü,
İndi ömrün dərdi bölən vaxtıdır.
Pərvazlanıb hey uçurdum quştəki,
Həvəsimin bir-bir ölən vaxtıdır.

Dağ döşündə bəyaz duman sürünür,
Göy üzündə gülən şimşək görünür,
Dünya yenəyaşıl dona bürünür,
Qışın gedən, yazın gələn vaxtıdır.

Heç qədrini bilməmişəm qəlbimin...
Köks ötürdüm arxasınca hər ilin.
Açılmamış qönçələnən tər gülün
Yanağının tərin silən vaxtıdır.

Hay-harayla çaylar axır dərədən,
Ovçu dönür, ceyran qaçır bərədən,
Yetmiş gəldi, Atəş, saldın sərə dən,
Qocalığın üzə gülən vaxtıdır.

22.02.2026.