Müğənni Səidə Sultanla aparıcı Tarix Əliyev (Tolik) arasında qalmaqal yaşanıb.

“Qafqazinfo” xəbər verir ki, hadisə “TikTok”da canlı yayım zamanı baş verib.

Belə ki, Xalq artisti Brilliant Dadaşovanın da iştirak etdiyi canlı yayımda efirlərdəki problemlər müzakirə olunub. Bu zaman Səidə Sultanla Tolik arasında dava düşüb. Onların bir-biriləri haqqında səsləndirdikləri təhqiramiz ifadələr gərginliyi daha da artırıb.

Bundan sonra hər iki tanınmış şəxs instaqram hesablarında paylaşım edərək bir-birilərinin ünvanına əxlaqsız ifadələr, söyüşlər səsləndirib. Tolik öz paylaşımında Səidəni narkotik istifadəçisi olmaqda ittiham edib. Müğənni isə buna cavab olaraq paylaşdığı videoda bildirib ki, o, səhhətindəki problemlərə görə bir neçə gün öncə Sabunçu Tibb Mərkəzində müalicə alıb və qollarındakı izlər də bu səbəbdən yaranıb.

Ötən gündən davam edən qalmaqal sosial şəbəkələrdə də müzakirə mövzusuna çevrilib. İstifadəçilər, demək olar ki, hər gün efirlərdə və sosial mediada qarşılaşdığımız Səidə Sultan və Tolik kimi tanınmışların timsalında işlətdikləri təhqirdolu ifadələrə görə hər kəsin İnzibati Xətalar Məcəlləsinin 510.2-ci maddəsinə əsasən cəzalandırılmalı olduğu ilə bağlı çağırış ediblər.

Qeyd edək ki, 510.2-ci maddə (Xırda xuliqanlıq - internet informasiya ehtiyatında və ya informasiya-telekommunikasiya şəbəkəsində kütləvi nümayiş etdirildiyi halda ictimai mənəviyyatı təhqir edən, cəmiyyətə açıqca hörmətsizlik ifadə edən hərəkətlərin edilməsinə, yəni əxlaqsız ifadələrin səsləndirilməsinə və ya belə məzmun təəssüratı yaradan jestlərin edilməsinə, yaxud insan bədəninin hissələrinin əxlaq normalarına və milli-mənəvi dəyərlərə zidd formada göstərilməsinə görə) İnzibati Xətalar Məcəlləsinə bu ilin 26 yanvar tarixindən daxil edilib.

Xatırladaq ki, müğənni Səidə Sultan bir neçə gün öncə instaqram hesabında video paylaşaraq bir ildir efirə çıxmamasının səbəbini açıqlayıb. O, hazırkı efir məkanında etik normaların itdiyini vurğulayaraq, verilişlərdə yaşanan qalmaqalların təbliğini pisləyib.