Türkiyənin xarici işlər naziri Hakan Fidan İrana mümkün hərbi zərbə endirilsə belə, ölkədə siyasi hakimiyyət dəyişikliyinin baş verməsini real hesab etmir.

"Turaztv.az" "Unikal"-a istinadən xəbər verir ki, o, bu fikri CNN Türk telekanalına müsahibəsində səsləndirib. Nazir bildirib ki, güc tətbiqi fonunda İranda siyasi dəyişikliklərin baş verəcəyini gözləmir.

Fidanın sözlərinə görə, Tehranın mümkün cavab addımları — o cümlədən ABŞ-ın hərbi bazalarına zərbələr — münaqişənin kəskin şəkildə eskalasiyasına gətirib çıxara bilər. Bu eskalasiya təkcə hərbi deyil, eyni zamanda enerji sahəsinə də ciddi təsir göstərəcək.

Nazir vurğulayıb ki, belə bir ssenari regional sabitlik üçün ciddi risklər yaradar və terrorla mübarizəni çətinləşdirər. O əlavə edib ki, Ankara hadisələrin bu istiqamətdə inkişafında maraqlı deyil və bütün region üçün uzaqmənzilli nəticələrə səbəb ola biləcək eskalasiyanın qarşısının alınmasının tərəfdarıdır.