Silahlı qiyam istənilən halda yatırılacaqdı. Qiyamın təşkilatçıları adekvatlığını itirmələrinə baxmayaraq, bunu başa düşməyə bilməzdilər.

Turaztv.az AZƏRTAC-a istinadən xəbər verir ki, bunu Rusiya Prezidenti Vladimir Putin televiziya ilə xalqa müraciətində deyib.

O vurğulayıb ki, hadisələrin əvvəlindən yaranmış təhlükənin qarşısının alınması, konstitusiya quruluşunun, vətəndaşların həyatının və təhlükəsizliyinin qorunması üçün bütün zəruri qərarlar dərhal qəbul edilib.

Rusiya Prezidenti qiyamçıların qarşısında dayanan hərbçilərə, hüquq-mühafizə və kəşfiyyat orqanlarına təşəkkür edib. "Üsyançıların qarşısında dayanan bütün hərbi qulluqçularımıza, hüquq-mühafizə orqanlarının əməkdaşlarına, xüsusi təyinatlılara təşəkkür edirəm. Onlar öz borclarına, andlarına və xalqına sadiq qaldılar. Qəhrəman pilotların cəsarəti və fədakarlığı Rusiyanı faciədən xilas etdi”, - Putin bildirib.

Qeyd edək ki, iyunun 23-də “Vaqner” PMC-nin təsisçisi Yevgeni Priqojin özünün “Telegram” kanalında bölmələrinin hücuma məruz qalması barədə açıqlamalar verib və buna görə Rusiya Federasiyasının hərbi rəhbərliyini günahlandırıb. Rusiya Müdafiə Nazirliyi isə bu məlumatı yalan adlandırıb. Priqojini dəstəkləyən PMC bölmələri Rostova və Moskvaya doğru hərəkət edib. Federal Təhlükəsizlik Xidməti silahlı üsyana çağırışla bağlı cinayət işi açıb.

Rusiya Prezidenti Vladimir Putin iyunun 24-də televiziya ilə çıxışında “Vaqner”in rəhbərliyinin hərəkətlərini xəyanət adlandırıb. Daha sonra Belarus Prezidenti Aleksandr Lukaşenko Priqojinlə danışıqlar aparıb, nəticədə PMC qüvvələri düşərgələrinə qayıdıb. Razılığa əsasən, Priqojinə qarşı cinayət işinə xitam veriləcək, o, Belarusa gedəcək.