Aprelin 1-də Sumqayıt Şəhər Polis İdarəsinin rəisi polis polkovniki Fəqan Azadəliyev tələbələrlə görüşüb.

Turaztv.az AZƏRTAC-a istinadən xəbər verir ki, görüşdə müasir dövrdə insan sağlamlığına zərər vuran, ağ ölüm kimi tanınan narkotik vasitələrin zərərindən danışılıb. Narkotik vasitələrin daha çox gənclər arasında sürətlə yayılması təhlükəsinin qarşısının alınması üçün belə maarifləndirici tədbirlərin keçirilməsinin əhəmiyyəti qeyd edilib. Azərbaycanda narkomaniya əleyhinə tədbirlərin daim diqqət mərkəzində saxlanıldığı bildirilib, bu istiqamətdə həyata keçirilən müvafiq dövlət proqramları haqqında məlumat verilib.

Fəqan Azadəliyev ölkə rəhbərliyi tərəfindən təsdiq olunmuş dövlət proqramlarının və müvafiq qanunvericilik aktlarının icrası ilə bağlı ətraflı məlumat verib. Eyni zamanda, qanunsuz olaraq narkotik vasitələri, psixotrop maddələri və ya onların prekursorlarını hazırlama, istehsal etmə, əldə etmə, saxlama, daşıma, göndərmə ilə bağlı Azərbaycanda baş verən cinayətlər barədə danışıb. O, narkomaniyanın fəsadlarına qarşı mübarizənin hüquqi bazası və digər məsələlər haqqında da ətraflı məlumat verib.

Tədbirdə Sumqayıt Şəhər Polis İdarəsinin narkomaniyanın fəsadları haqqında hazırladığı videoçarx nümayiş olunub.

Sonda gəncləri maraqlandıran suallar cavablandırılıb, mövzu ətrafında diskussiya aparılıb.