Azərbaycanda aparılan uğurlu gənclər siyasətinin nəticəsində intellektual, bilikli, vətənpərvər gənclik yetişib.

AZƏRTAC-ın bölgə müxbiri xəbər verir ki, bu fikir Ağcabədi Regional Mədəniyyət İdarəsi Ağdam rayon Rahib Məmmədov adına Döyüş Şöhrəti Muzeyinin, Ağdam Rayon Tarix Diyarşünaslıq Muzeyinin və Mahrızlı kənd tam orta məktəbinin birgə təşkilatçılığı ilə 2 fevral - Gənclər Günü münasibətilə keçirilən “Fəxr edirik gəncliyimizlə” adlı tədbirdə səsləndirilib. Əvvəlcə respublikamızın müstəqilliyi və ərazi bütövlüyü uğurunda canından keçən Vətən övladlarının xatirəsi bir dəqiqəlik sükutla yad edilib, Azərbaycanın Dövlət Himni səsləndirilib.

Döyüş Şöhrəti Muzeyinin direktoru Sahib Məmmədov və Ağdam Tarix-Diyarşünaslıq Muzeyinin direktoru Ülvi Qədirov çıxışlarında ölkəmizdə yeniyetmə və gənclərin vətənpərvərlik tərbiyəsinin prioritet istiqamətlərdən olduğunu bildiriblər. Diqqətə çatdırılıb ki, məhz bunun nəticəsidir Vətənini sevən, hər zaman onun tərəqqisinə çalışan, azadlığı uğrunda canını qurban verməyə hazır olan gənclər ordusu formalaşıb.