Lənkəran rayonunun Sütəmurdov kənd tam orta məktəbində Gənclər və İdman, Təhsil nazirliklərinin, Azərbaycan İdman Könüllüləri İctimai Birliyinin birgə həyata keçirilən “Çempionumuz” sosial idman layihəsi çərçivəsində taekvondo üzrə ikiqat Azərbaycan çempionu, Avropa çempionatının iştirakçısı, beynəlxalq yarışların qalibi, “Qara kəmər 3-cü dan” üzrə idman ustası Samir Cavadlı ilə görüş keçirilib.

AZƏRTAC-ın bölgə müxbiri xəbər verir ki, tədbirdə çıxış edən məktəbin direktoru Kamran Əliyev, Lənkəran Şəhər Gənclər və İdman İdarəsinin əməkdaşları Sadiq Həmidov və Yusif Xamıyev yeniyetmə və gənclər arasında sağlam həyat tərzinin, idmanın təbliğ edilməsi, yüksək nailiyyət qazanmış idmançıları cəmiyyətdə tanıtmaq məqsədi daşıyan layihənin əhəmiyyətini yüksək dəyərləndiriblər.

Görüşdə çıxış edən respublikamızın tanınmış idmançısı Samir Cavadlı ölkəmizdə idmanın inkişafına göstərilən dövlət dəstəyindən, Azərbaycanda və onun hüdudlarından kənarda keçirilən yarışlarda qazandığı uğurlardan danışıb.

Tədbirdə ölkəmizdə idmanın inkişafı, Azərbaycan idmançılarının beynəlxalq yarışlarda qazandığı uğurlardan bəhs edən videoçarx nümayiş etdirilib.
Sonda Samir Cavadlı müəllimləri və şagirdləri maraqlandıran sualları cavablandırıb.