Belarusun ölkəmizdəki keçmiş səfiri Nikolay Patskeviç Ağdam şəhərində olub

Baxış Sayı:143

Belarusun ölkəmizdəki keçmiş səfiri Nikolay Patskeviç Ağdam şəhərində olubBelarusun ölkəmizdəki keçmiş səfiri Nikolay Patskeviç Ermənistanın işğalından azad olunmuş Ağdam şəhərinə səfər edib.

AZƏRTAC-ın bölgə müxbiri xəbər verir ki, Azərbaycan Respublikası Prezidentinin xüsusi nümayəndəliyinin əməkdaşları qonağa Ağdam şəhəri, burada törədilən erməni faşizmi, tarixi, dini, mədəni abidələrimizin vandalizmə məruz qalması, eləcə də Azərbaycan dövləti tərəfindən burada aparılan bərpa-quruculuq işləri barədə məlumat veriblər. Bildirilib ki, Azərbaycan Respublikasının Prezidenti İlham Əliyev mayın 28-də Ağdama səfəri zamanı avtomobil yolunun, yaşayış binasının, Sənaye Parkının, 1 saylı məktəbin yeni binasının təməlini qoyub, park-meşədə ağac əkib. Baş plana əsasən, Ağdam şəhərinin ərazisi 1750 hektar, şəhərətrafı bağlar 2450 hektar olacaq. Burada ağıllı və dayanıqlı sosial infrastruktur yaradılacaq.

Nikolay Patskeviç sonra Ağdam şəhərindəki İmarət qəbiristanlığına gəlib. Məlumat verilib ki, burada Qarabağ xanlığının əsasını qoymuş Pənahəli xanın və xanlıqda müxtəlif illərdə hakimiyyətdə olmuş hökmdarlar - İbrahimxəlil xanın və onun oğlu Mehdiqulu xanın qəbirüstü türbələri, həmçinin Mehdiqulu xanın qızı Xurşidbanu Natəvanın məzarları olub. Qarabağ xanlarının nəslindən olmuş digər görkəmli şəxslər də bu qəbiristanlıqda dəfn edilib. Ağdam şəhəri işğal olunduqdan sonra Pənahəli xanın buradakı sarayı və qəbiristanlıq erməni vandalizminə məruz qalıb. Erməni vandalları İbrahimxəlil xanın türbəsini və Qarabağın sonuncu hakimi Mehdiqulu xan Cavanşirin qızı Xurşidbanu Natəvanın qəbirüstü abidəsini də dağıdıblar. İşğal edilən ərazilərdəki məscidlər, məzarlıqlar kimi Pənahəli xanın imarəti də ermənilər tərəfindən təhqir edilib. Tövlə kimi istifadə edilən xan sarayında inək və donuz saxlanılıb.

Ağdam Cümə məscidinə gələn qonağa məlumat verilib ki, Ağdam Cümə məscidi 1868-1870-ci illərdə memar Kərbəlayi Səfixan Qarabaği tərəfindən tikilib. Bu məscid “Qarabağ məscid memarlığı” məktəbinə aiddir. Ermənilər məscidi hərbi məqsədlərə görə dağıtmayıb, onun minarələrindən koordinasiya üçün istifadə ediblər. Məscidin minarələri daxildən sökülüb, tavanı bir neçə yerdən uçurulub, dizayn və yazıları bilərəkdən yararsız, tanınmaz vəziyyətə salınıb. Erməni vandalları Ağdam Cümə məscidində də mal-heyvan saxlamaqla azərbaycanlılara, müsəlman aləminə qarşı öz nifrətlərini nümayiş etdiriblər.

Belarusun ölkəmizdəki keçmiş səfiri Ağdam şəhərinin mərkəzi küçəsi, Ağdam Dram Teatrının və Çörək muzeyinin qalıqları ilə də tanış olub.

Belarusun ölkəmizdəki keçmiş səfiri Nikolay Patskeviç Ağdam şəhərində olub
Belarusun ölkəmizdəki keçmiş səfiri Nikolay Patskeviç Ağdam şəhərində olub
Belarusun ölkəmizdəki keçmiş səfiri Nikolay Patskeviç Ağdam şəhərində olub

Oxşar xəbərlər
SON XƏBƏRLƏR