Əmtəə birjalarda qızılın qiyməti iyunun 22-dən bəri ən yüksək səviyyəyə yaxınlaşıb.

AZƏRTAC xəbər verir ki, hazırda Nyu-Yorkun COMEX əmtəə birjasında qızılın bir troya unsiyasının qiyməti 4156 dollardır.

Ekspertlərin fikrincə, ABŞ-də uçot dərəcəsinin artırılacağı ilə bağlı gözləntilərin azalması əmtəə bazarlarına təsirsiz ötüşmür və qızılın qiymətinin artmasına səbəb olur. Lakin dolların dəyər qazanması qızılın qiymətindəki artımı məhdudlaşdırmağa davam edir.

“J.P. Morgan” bankının analitikləri hesab edir ki, əsas sektorlardan qızıla tələbat əvvəllər proqnozlaşdırıldığı qədər güclü olmayacaq. Bank cari ilin üçüncü rübündə qızılın qiymətinin 4300 dollar, dördüncü rübdə isə 4500 dollar olacağını proqnozlaşdırır. “J.P. Morgan” mərkəzi bankların alışlarının və fiziki tələbin 2027-ci ildə qızılın qiymətini dəstəkləməyə davam edəcəyini gözləyir.

Qızıl ənənəvi olaraq inflyasiyaya qarşı hedcinq kimi qəbul edilsə də, yüksək faiz dərəcəsi mühitində cəlbediciliyini itirir, çünki heç bir gəlir gətirmir. Dollar indeksi son 13 ayın ən yüksək səviyyəsinə yüksəlib və bu da qızılı beynəlxalq alıcılar üçün daha bahalı edir.