Alimlər itirilmiş dişlərin yenidən çıxmasını təmin edə biləcək preparat üzərində çalışırlar

İnsanlarda ömür boyu cəmi iki dəfə diş çıxır - əvvəl süd dişləri, sonra isə daimi dişlər. Lakin Yaponiyanın "Toregem Biopharma" şirkəti orqanizmdə yeni dişlərin formalaşmasını təmin edə biləcək preparatın hazırlanması istiqamətində mühüm addım atdığını açıqlayıb.

Bu barədə "snob.ru" nəşri yazıb.

İnsanlar üzərində sınaqlar davam edir

Kyoto Universitetinin dəstəyi ilə çalışan yapon alimləri müəyyən ediblər ki, diş itirildikdən sonra çənədə "yatmış" vəziyyətdə qalan diş rüşeymləri mövcuddur. Lakin xüsusi bir zülal onların inkişafını dayandırır. Bunun əsasında hazırlanan TRG-035 preparatı həmin zülalın təsirini neytrallaşdıran anticisimdir. İlk mərhələdə preparat siçanlar və yırtıcı məməlilər üzərində sınaqdan keçirilib və itirilmiş dişlərin yerində yeni dişlərin çıxmağa başladığı müşahidə olunub.

İlk nəticələr hələ açıqlanmayıb

2024-cü ilin sentyabrında preparat ilk dəfə insanlar üzərində sınaqdan keçirilməyə başlanıb. Tədqiqatda ən azı bir azı dişi çatışmayan müxtəlif yaşlarda 30 kişi iştirak edib. Sınaqların ilk mərhələsi 2026-cı ilin əvvəlində başa çatsa da, nəticələr hələ ictimaiyyətə açıqlanmayıb. Məlumata görə, bu mərhələdə preparat aşağı dozada tətbiq olunub, əsas məqsəd isə mümkün yan təsirləri və zülalın nə dərəcədə bloklandığını qiymətləndirmək olub.

Ümidverici nəticələr gözlənilir

Şirkət ilk mərhələnin yekunlarını açıqlamasa da, artıq ikinci mərhələyə keçəcəyini bildirib. Növbəti sınaqlarda preparat anodontiyadan - yəni süd və ya daimi diş rüşeymlərinin anadangəlmə olmaması ilə xarakterizə olunan nadir xəstəlikdən əziyyət çəkən 2-7 yaşlı uşaqlarda yoxlanılacaq.

Mütəxəssislər hesab edir ki, ikinci mərhələyə keçid preparatın ən azı təhlükəsiz olduğunu göstərir. Şirkət preparatın 2030-cu ildən etibarən tibbi istifadəyə verilməsini planlaşdırır. Bununla belə, alimlər hələ də bir sıra sualların cavabsız qaldığını vurğulayırlar.

Yeni dişlərin tam funksional olub-olmayacağı, sinir ucları və qan damarları ilə normal əlaqə yaradacağı, eləcə də düzgün diş düzümü formalaşdıracağı hələ məlum deyil. Bununla belə, preparat gözlənilən nəticəni versə, bu, stomatologiyada əsl inqilab hesab oluna bilər.