Xəbərlər
25.06.2026, 23:03
Zöhrə Qaraqızı : HƏR YAZILAN SEİR OLMAZ - FOTO
Şe(i)rin dərin hikməti var,
Hər ürəyə yollar açar,
Günəş kimi işıq saçar,
Yoxsa , şeir şeir olmaz...
Onu yazan şair olmaz.
Yandırmasa, yaxmasa o,
Bulaq kimi axmasa o,
İldırım tək çaxmasa o,
Yoxsa , şeir şeir olmaz...
Onu yazan şair olmaz.
Sevgi yoxsa, ürək yoxsa,
Mənasına gərək yoxsa,
Xoş arzular, dilək yoxsa,
Yoxsa , şeir şeir olmaz...
Onu yazan şair olmaz.
Hikmətdən biçilə donu,
Ləl - gövhər bilələr onu.
Gözəlliklə bitə sonu,
Yoxsa , şeir şeir olmaz...
Onu yazan şair olmaz.
Hecasi, vəzni yerində,
Ruhu, mənası dərində.
Sözü gövhər dəyərində,
Yoxsa , şeir şeir olmaz..
Onu yazan şair olmaz.
Şeir gərək gələ haqdan,
Nur götürə bir çıraqdan.
Qəlbə axa hər dodaqdan,
Yoxsa, şeir şeir olmaz...
Onu yazan şair olmaz.
Zöhrə, sözü söylə elə,
Şe(i)rindən nur yağsın elə.
Şah əsərin qalır hələ,
Yoxsa, şeir şeir olmaz..
Onu yazan şair olmaz.
Son xəbərlər
Ən çox oxunanlar
- Bu gün
- Bu həftə
- Bu ay
