MƏMMƏD QƏDİR : Qulağının dalın görərsən

Xəbərlər

14.06.2026, 08:34

MƏMMƏD QƏDİR : Qulağının dalın görərsən - FOTO

Şair, demədimmi özünü gözlə,
Bir gün yandıracaq, oynama közlə
Sözün toz yolunda gedirsən yüzlə,
Düşünmə bağışlar qəza, a sərsəm,
Odee .. qulağının dalın görərsən.

Ha de ki, zənginəm, söz varımızdı,
Pətək bizlik deyil, öz aramızdı,
Sancacaq, demə ki, öz arımızdı,
Nə şanın, nə də ki balın görərsən,
Odee... Qulağının dalın görərsən.

Min fikirlə yatıb key duran adam,
Əzabın toyunda bəy duran adam,
Çılpaq könülləri geydirən adam,
Özünü həmişə yalın görərsən,
Odee... Qulağının dalın görərsən.

Fərari kef çəkir, az öl yerinə,
Dənini sayan yox sünbül yerinə,
Könül çəmənində bülbül yerinə,
Qədir Rüstəmovun valın görərsən,
Odee... Qulağının dalın görərsən.

Az gəz yerin altın, göyün dibini,
Dayılarda fər yox, çağır bibini,
Siçanlar oynayan nazik cibini,
Yatsan yuxularda qalın görərsən,
Odee... Qulağının dalın görərsən.

Pul ver kitab çıxar, üstündə qalsın,
Odun qaldımı ki, tüstün də qalsın,
Hələ düşünürsən büstün də qalsın?
Elin yaddaşına birdən girərsən...
Odee... Qulağının dalın görərsən.

Yaramırsan oğul, nə ər yerinə,
Şalvarında ipdi kəmər yerinə,
Çapıb söz kəhərin nəmər yerinə
Alnında eşşəyin nalın görərsən,
Odee... Qulağının dalın görərsən.

Gül kimi bir isim qoymuşdu atan,
Sözə xidmətçilik ən böyük xətan,
İndi "dəli" deyib çağırır çatan,
Sənə şair deyim? Ay sən öləsən,
Odee... Qulağının dalın görərsən.

Məmməd, sözə satdı bütün ömrünü,
Yandırdı boş yerə tütün ömrünü,
Adamkən yaşadı itin ömrünü,
Dəyər gözləyirdin, dəlisən nəsən?
Odee... Qulağının dalın görərsən...