Sən şirinsevənsən - FOTO

Xəbərlər

30.05.2026, 20:32

Sən şirinsevənsən - FOTO

Vahid Çəmənli,
şair-publisit

Sən şirinsevənsən,
bilirəm gülüm.
Bax, indi ən şirin xatirələri,
Büküb al - əlvan bir göy qurşağına
Sənə göndərəcəm...
Onda bilərsən
Orda səndən başqa heç kim olmayıb...

Sən lalə dərmişdin yaşıl çəməndən,
Göylər zəhmətini elədi hədər.
Bir qəfil gurultu, şıdırğı yağış
Təpədən dırnağa islatdı bizi
Həmərsin koluna çatana qədər.

Lalənin al rəngi yanaqlarında,
Lalənin al rəngi dodaqlarında.
Ağappaq paltarın lalə rəngində,
bir də ağ bədənin... cizgilərində.

Sən şirinsevənsən,
Xoş təbəssümü
Bükub dan yerinin şəfəqlərinə
sənə göndərəcəm
Onda bilərsən...
O yaz səhəri
Necə qoxuyurdu inciçiçəyi
Nanənin, yarpızın ətri necəydi?..

Söylə yadındamı, aylı gecəydi.
Gedirdik bir yaşıl çinar altında
O səssiz, o tənha bulağın üstə.
Səsin titrəyirdi, əlin əsirdi
Elə bil o isti yay gecəsində
Bütün vucudunu soyuq kəsirdi...
Pencəyim yox idi atam çiyninə,
Tutdum əllərindən,
...qorxma, burdayam!
Mən hardan biləydim yay gecəsində
bəzən istidən də üşüyür adam...

Sən şirinsevənsən...
Öz kədərimi
Bukəcəm bir soyuq qış gecəsinə...
Yox, bunu ta sənə göndərməyəcəm.
Nəyinə gərəkdi bu qəmli üzüm,
Nəyinə gərəkdi bu nəmli gözüm,
Nəyinə gərəkdi,-
Ya dəyişmişəm,
Ya da əvvəlki tək
Şənəm,
kövrəyəm.
Nəyinə gərəkdi, biləsən gülüm
Hardayam, necəyəm,
Nədi iş – peşəm?

Hər şey ötüb keçdi
bircə an kimi
Elə bil həyata doğulmamışdıq.
Elə bil mən səni heç görməmişdim,
Elə bil heç zaman bir olmamışdıq.