Məncə, ağılsız insan yoxdur. Ağılı fərqli qiymətləndirənlər var. Dəlilər belə ağılın çoxluğundan “havalanır”. Bir çoxları isə ağılını izah etmək qabiliyyətindən məhrumdur.
Buna inananlar da, inanmayanlar da dünyanı, həyatı, yaşayışı ağıl durumlarının hökumranlığı altında görür. Hökumran durumlar da tez-tez dəyişir.
Ötən əsrlərdən bəri inkişafda olsaq da, dağılırıq da, dəyişirik də... Əsarətdən isə qurtulmuruq. Bu mövqelər dəyişilsə də, ağılın tam anlamı tapılmır. Ağılların mübarizəsi də bitmir. Fərqli fikir toplumuna belə bir aydınlıq gətirmək istəyirəm.
Bu dünyada hər sahədə mütəxəssis olmaq heç kimə nəsib olmayıb. Hər kəs öz bacarığına uyğun yaşasa da, məlumatlı olduğu digər sahələr barədə yalnız öz fikrini bildirə bilər yaxud xəbərləri paylaşa bilər.
Ağıla ümumi idrak sığmır. Ömür boyu öyrənsək də, biliklər tam ağıl vermir. Dünya sonsuz olduğu kimi, bilmədiklərimiz də sonsuzdur. Məncə, dünyanı idarə etmək zirvəsinə hələ də çatılmayıb.
Demək ki, hər birimiz ağlımızı bacarığımıza uyğun yönləndirməliyik. Yazdıqlarımla razılaşmayan çox olacaq. Çünki hər birimizin fərqli fikir dünyası var. Bu dünyanı idarə edən isə biliklərimiz, duyğularımız, hisslərimiz, ruhi anlayışlarımızdır.
Və əlbəttə ki, ətrafımızda baş verənlərin mənəvi təsirlərindən də çox asılılıq var. Məncə, dünyanı da, özümüzü də idarə edən ağıl və ruhun təcəssümüdür. Ürək istəkləri ağıla qalib gəlsə, dünya dağılacaqmı? Bunu bilmirik.
Bu mübarizə, məncə, ömür boyu davam edəcək.