Turaztv.az » Xəbərlər » NƏLƏR SÖYLƏDİ LALƏLƏR - FOTOLAR
Xəbərlər

NƏLƏR SÖYLƏDİ LALƏLƏR - FOTOLAR

14.05.2026, 00:08 135
Müəllifi: Natella Nur

Baharın füsünkar vaxtı,
Qurulanda şahlıq taxtı,
Gəzdim doğma Qarabağı,
Dilbər guşəli torpağı.

Çəmən- çiçək naz eylədi,
Qaranquşlar əl eylədi.
Ördək, qazı göldə üzdü,
Durnaları göydə süzdü.

Al lalələr yırğalandı,
Meh əsdikcə dalğalandı.
Tərif dedim:- sevindilər,
Dərim dedim:- incidilər.

Dedilər:- qoxlayıb atma,
Kökümüzdən ayrı salma.
Bu torpağa bağlanmışıq,
Gücü də ondan almışıq.

Sordum:- nədən rəngin aldır?
Sinəndəki qara xaldır?
Dedi:-Şəhidlər qanıdır,
Qara onun ağrısıdır.

Gəlin, ziyarət eyləyin,
Şəhidləri yad eyləyin,
Vətən deyib vuruşdular,
Torpağına qovuşdular.

Şəhid ruhu göylərdədir,
Haqqı, gözü yerlərdədir.
Siz onları unutmayın!
Ailəsini unutmayın!

Şair ruhum göyə qalxdı,
Şimşək olub yerə çaxdı.
Nələr söylədi lalələr?
Kövrək baxışlı lalələr...

Oxşar xəbərlər