Professor Vidadi Orucov - 70

Obrazlı şəkildə ifadə etsək, elm dilə gəldikdə söz olar, əmələ çevrildikdə isə nur saçar. İnsanlar çox zaman deyilənləri unudar, amma görülən işi yadda saxlayar. Elmini əməli ilə təsdiqləyən alim cəmiyyətə yol göstərən çıraq kimidir. Onun davranışı, ədaləti, təvazökarlığı və insanlara faydası elminin ən böyük sübutuna çevrilər. Əməl ilə bəzənməyən elm isə köksüz ağaca bənzər - nə kölgəsi olar, nə də bəhrəsi. Buna görə də alimin həqiqi dəyəri bildiklərində deyil, bildiyini necə yaşatdığında görünər.
Bəli, alimin əməli bəlli aləmə... Bu düşuncələri təbrikimə müqəddimə etməyim təbii ki, əbəs yerə deyil. Əslində sözümün canı bu fikir müstəvisində muvazi olar ehtiva olunan bir ömür yoluna xülasə - baxışı vurğulamaqdır.
Qaim-qədim Borçalı elinin dəyərli yetirməsi, ziyalı kredosu xaliqə məhəbbət, xilqətə mərhəmətdən yoğrulmuş azman alim-aydınımız, söz-saz,hikmət xiridarı, Lənkaran Dövlət Universitetinin Fizika, kimya və biologiya kafedrasının müdiri, pedaqogika üzrə elmlər doktoru, professor Vidadi Orucovu dünyaya gəldiyi gün (12 may), ömür təqviminin 70 illiyi münasibətilə gözünə-könlünə köçən gözəlliklər, uğurlu özəlliklər diləyi ilə təbrik edir və ithaf söz çələngimi ən xoş arzularla mənim üçün hər yerdə və hər zaman görünən əziz dostuma könül ziyarəti olaraq ehtiramla ünvanlayiram:

Həyat gözəlləşir saleh əməllə,
Məslək məhək daşı məram-təməllə.
Alimin əməli bəlli aləmə,
Büllur tək bərq vurur aynada əksin.

Ömür də bir xalı, ilməsi illər,
Xalis nə olduğun ariflər bilər.
El qədri bilənə el alqış dilər,
Yurda yayılıbdı sorağın-səsin.

Yetmiş illik yolda, Vidadi Oruc,
Elmin qüdrətindən aldın təpər-güc.
Sandın sərraflığı özünə bir borc,
Sən ki əzizisən, dostum, hər kəsin!
✍️Tapdıq ƏLİBƏYLİ