Yeni bir araşdırmaya görə, süni intellekt insanların söhbət tarixçəsinə baxaraq onların uyumluluq və emosional sabitlik kimi şəxsiyyət xüsusiyyətlərini 60%-ə çatan dəqiqliklə təxmin edə bilib.

Sürix Texniki Universitetinin (ETH Zurich) tədqiqatçıları ABŞ və Böyük Britaniyadan olan 668 "ChatGPT" istifadəçisindən söhbət tarixçələrinin surətini paylaşmağı xahiş ediblər. Bu yazışmalar əsasında şəxsiyyət xüsusiyyətlərini müəyyən edə bilən xüsusi süni intellekt modeli hazırlanıb. Tədqiqat çərçivəsində mövzularına görə kateqoriyalara ayrılmış 62 mindən çox söhbət toplandığı bildirilir.

"Böyük beşlik" şəxsiyyət testi
Süni intellekt modeli psixologiyada "Böyük beşlik" kimi tanınan beş əsas xüsusiyyəti təxmin etməyə çalışıb:

Uyumluluq (xoşxasiyyətlilik)

Məsuliyyətlilik

Emosional sabitlik

Ekstravertlik (xarici aləmə açıqlıq)

Təcrübələrə açıqlıq

Eyni zamanda, iştirakçılar şəxsiyyətlərini dəqiq müəyyən etmək üçün standart psixoloji testdən keçiblər. Nəticələr göstərib ki, tənzimlənmiş süni intellekt modeli şəxsiyyət xüsusiyyətlərini 61%-ə qədər dəqiqliklə müəyyən edə bilir. Sistemin xüsusilə uyumluluq və emosional sabitliyi proqnozlaşdırmaqda uğurlu olduğu, lakin məsuliyyət hissini müəyyənləşdirməkdə çətinlik çəkdiyi müşahidə edilib.

İstifadə müddəti artdıqca risk də artır
Araşdırma maraqlı bir faktı da üzə çıxarıb: süni intellektin təhlil edə biləcəyi söhbət tarixçəsi nə qədər uzundursa, nəticələr bir o qədər dəqiq olur. Bu o deməkdir ki, insan süni intellektdən nə qədər çox istifadə edərsə, şəxsiyyətinin təfərrüatlarının üzə çıxma ehtimalı bir o qədər artır.

Böyük miqyaslı manipulyasiya xəbərdarlığı
Tədqiqatçılar fərdi səviyyədə risklərin aşağı olduğunu qeyd etsələr də, bu məlumatların bədniyyətli şəxslərin əlinə keçməsi halında "böyük miqyaslı risklərin" yarana biləcəyi barədə xəbərdarlıq edirlər. Onların fikrincə, belə şəxsi məlumatlar yanlış məlumat yaymaq və ya siyasi təbliğat aparmaq məqsədilə genişmiqyaslı manipulyasiya kampaniyalarında istifadə edilə bilər.

Mütəxəssislər ümid edirlər ki, bu araşdırmanın nəticələri gələcəkdə şəxsi məlumatların süni intellektlə lüzumsuz paylaşılmasının qarşısını alan və şəxsi detalları avtomatik təmizləyən sistemlərin yaradılmasına kömək edəcək.