Kral ailəsi ilə münasibətləri gərgin olan Şahzadə Harri İngiltərəyə səfəri zamanı ailə üzvlərinin qəsdən ondan uzaq durması ilə üzləşib.

"Turaztv.az" “Qafqazinfo”-ya istinadən xəbər verir ki, iddialara görə, Harrinin Londonda olduğu günlərdə kral ailəsinin əsas üzvləri müxtəlif səbəblərlə ölkədən kənara çıxıblar.

Məlumata görə, Şahzadə Uilyam və həyat yoldaşı Keyt Middlton həmin vaxt Şotlandiyaya səfər edib, Kral Çarlz isə fərqli proqram çərçivəsində İngiltərədən kənarda olub.

Saray mənbələri bu səfərlərin təsadüfi olmadığını bildirirlər.

İddia olunur ki, Kral Çarlz oğlu ilə birbaşa ünsiyyətdən çəkinir və əlaqəni yalnız köməkçiləri vasitəsilə saxlayır. Bunun əsas səbəbi kimi Şahzadə Harrinin keçmiş açıqlamaları, kitabı, müsahibələri və məhkəmə prosesləri nəticəsində şəxsi söhbətlərin ictimailəşdirilməsi ilə bağlı yaranan etimadsızlıq göstərilir.

Şahzadə Harrinin münasibətləri normallaşdırmaq cəhdi ilə Londona səfəri gözlənilən yaxınlaşmanı təmin etməyib. O, məhkəmə prosesi üçün ölkədə olduğu müddətdə də ailə üzvləri ilə görüşə bilməyib.

Qeyd edək ki, 2020-ci ildə Şahzadə Harri və həyat yoldaşı Meqan Markl kral ailəsindəki rəsmi vəzifələrindən imtina edərək, ABŞ-yə köçmüşdülər. “Megxit” adlandırılan bu addımdan sonra Harri Opra Uinfriyə verdiyi müsahibədə kral ailəsini irqçilik, laqeydlik və psixoloji təzyiqdə ittiham etmişdi.

Gərginliyi daha da artıran əsas məqam Harrinin “Spare” adlı xatirə kitabı olub. Kitabda Kral Çarlz, Şahzadə Uilyam və saray daxilindəki şəxsi münasibətlər barədə yer alan açıqlamalar ailədaxili etimadı ciddi şəkildə zədələmişdi.

Bu prosesdən sonra Şahzadə Harrinin İngiltərəyə səfərləri məhdudlaşıb və sarayla əlaqələri əsasən rəsmi və dolayı kanallar üzərindən qurulub.