Qlobal münasibətlər sistemindəki ciddi sarsıntılar və qeyri-müəyyənlik fonunda Türkiyə ilə Azərbaycanın nümayiş etdirdiyi yüksək səviyyəli əməkdaşlıq və ortaq baxış qlobal böhranların mənfi nəticələrini minimuma endirməyə imkan verməklə yanaşı, Türk dünyasının strateji uğurları üçün də imkanlar açacaq.

Turaztv.az AZƏRTAC-a istinadən xəbər verir ki, bu fikri “Haber7” nəşrinə Türkiyə-Alman Universitetinin professoru Enes Bayraklı bildirib.

Ekspert, Azərbaycan Beynəlxalq Münasibətlərin Təhlili Mərkəzi və Türkiyə Xarici İşlər Nazirliyinin Strateji Araşdırmal Mərkəzi tərəfindən təşkil edilən Türkiyə və Azərbaycan Beyin Mərkəzlərinin Birinci Forumunun əhəmiyyətini vurğulayaraq, Şuşada keçirilən tədbirin gündəliyinə daxil olan mövzuların aktuallığını qeyd etdi.

Professor E.Bayraklı Ankara və Bakını “Türk dünyasında dərinləşən inteqrasiyanın və sıx əməkdaşlığın hərəkətverici qüvvəsi” adlandırıb. “Türkiyə və Azərbaycanın bu gün oynadığı rol, Avropa İttifaqının yaradılmasına səbəb olan inteqrasiya proseslərində Almaniya və Fransanın oynadığı rola bənzəyir. Şübhəsiz ki, Türk dünyasındakı inteqrasiya proseslərinin özünəməxsus xüsusiyyətləri var: geosiyasi, geocoğrafi, sosial və siyasi şərtlər. Buna görə də, Aİ-nin təcrübəsini nümunə kimi götürmək deyil, Türk dünyası üçün xüsusi olan öz inteqrasiya modelimizi formalaşdırmaq vacibdir”, - deyə türk universitetinin professoru əminliyini bildirdi.

O, həmçinin Türkiyə və Azərbaycanın coğrafi yerləşməsinin strateji əhəmiyyətinə, eləcə də Zəngəzur dəhlizinin açılmasının xüsusi əhəmiyyətinə diqqət çəkib və ölkəmizin işğaldan azad edilmiş ərazilərinin bərpasına dair səyləri alqışlayıb.