Azərbaycan Respublikasının Prezidenti İlham Əliyev və Ermənistan Respublikasının baş naziri Nikol Paşinyan arasında Əbu-Dabidə keçirilmiş ikitərəfli görüş regionda sülh prosesinin inkişafı baxımından mühüm əhəmiyyətə malikdir.

Bu sözləri AZƏRTAC-a Milli Məclisin deputatı Sevinc Hüseynova açıqlamasında bildirib.

Deputat qeyd edib ki, bu görüşün əsas fərqləndirici cəhəti onun vasitəçilərsiz, birbaşa ikitərəfli formatda baş tutmasıdır. Bu isə tərəflərin artıq birbaşa dialoqa hazır olduqlarını və problemin həllində qarşılıqlı siyasi iradənin formalaşdığını nümayiş etdirir.

S.Hüseynovanın sözlərinə görə, Prezident İlham Əliyev hər zaman məhz belə bir formatda – vasitəçilərsiz və ikitərəfli danışıqların tərəfdarı olub və bu istiqamətdə təşəbbüslərlə çıxış edib. Əbu-Dabi görüşündə sərhədlərin delimitasiyası və sülh müqaviləsinin mətninə dair razılaşdırılmış məsələlər kimi konkret nəticələrin əldə olunması bu yanaşmanın praktik və nəticəyönümlü olduğunu bir daha sübut edir.

“Görüşün Birləşmiş Ərəb Əmirliklərində neytral və hər iki ölkə ilə normal münasibətləri olan bir məkanda keçirilməsi də təsadüfi deyil. BƏƏ heç vaxt tərəflərdən birinin yanında yer almayıb, əksinə, dostluq və tərəfdaşlıq prinsipləri əsasında danışıqlar üçün əlverişli mühit yaradıb”, – deyə o vurğulayıb.

Deputat bildirib ki, bu görüşün obyektiv və gərginlikdən uzaq atmosferdə baş tutması mühüm irəliləyişlərə zəmin yaradıb: “Artıq aydın şəkildə görünür ki, Azərbaycanla Ermənistan arasında vasitəçiyə ehtiyac getdikcə azalır. Birbaşa təmaslar və bu təmaslardan doğan razılaşmalar sülhə aparan daha optimal və dayanıqlı bir yol kimi çıxış edir”.

Sevinc Hüseynova qeyd edib ki, Əbu-Dabi görüşündə əldə olunan razılaşmalar əsasında artıq sərhədlərin müəyyən olunması prosesi üzrə dövlət komissiyalarına müvafiq tapşırıqlar verilib. Eyni zamanda, kommunikasiya xətlərinin açılması, nəqliyyat əlaqələrinin bərpası və dövlətlərarası münasibətlərin normallaşdırılması sahəsində də mühüm irəliləyişlər əldə olunub.

“Sülh danışıqları uzun illər ABŞ, Avropa İttifaqı və Rusiya kimi üçüncü tərəflərin vasitəçiliyi ilə aparılsa da, bu zaman onların prosesə öz maraqlarını daxil etməsi müşahidə olunurdu. Əbu-Dabi görüşü isə göstərdi ki, birbaşa, ikitərəfli format daha səmərəli, çevik və real nəticəyə yönəlmiş yanaşmadır”, – deyə o bildirib.

S.Hüseynova əminliklə qeyd edib ki, bu kimi birbaşa təmaslar davamlı sülhün təmin olunmasına aparan ən real yoldur: “Prezident İlham Əliyevin rəhbərliyi ilə Azərbaycan regionda sabitlik, qarşılıqlı əməkdaşlıq və qalıcı sülh təşəbbüskarı kimi çıxış edir. Azərbaycanın mövqeyi aydındır – regionda bütün fundamental məsələlər öz həllini tapmalı, əməkdaşlığa əsaslanan yeni münasibətlər sistemi formalaşdırılmalıdır”, – deyə deputat əlavə edib.