Gədəbəydə Heydər Əliyev Mərkəzində “Sağlamlığın Qorunması” İctimai Birliyinin təşəbbüsü ilə ərsəyə gələn “Qaladan Qala – Gədəbəy: Tarixi Abidələr Diyarı” sənədli filminin təqdimatı keçirilib. Film Azərbaycan Respublikası Mədəniyyət Nazirliyi və Mədəni İrisin Qorunması, İnkişafı və Bərpası üzrə Dövlət Xidmətinin dəstəyi, eyni zamanda, Gədəbəy Rayon İcra Hakimiyyətinin əməkdaşlarının çəkilişlər zamanı yaratdıqları şərait və göstərdikləri dəstək sayəsində ərsəyə gəlib.

Gədəbəy Rayon İcra Hakimiyyətinin başçısı Orxan Mürsəlov mərasimi açaraq belə layihələrin mədəni irsin təbliğindəki əhəmiyyətini vurğulayıb və filmin ərsəyə gəlməsində əməyi olan ictimai birliyə və yaradıcı heyətə təşəkkürünü bildirib.

Sonra “Sağlamlığın Qorunması” İctimai Birliyinin sədri, tibb elmləri doktoru Yazgül Abdıyeva rəhbərlik etdiyi qurumun həyata keçirdiyi layihələr barədə ətraflı məlumat verib. Bildirib ki, təqdim olunan film vasitəsilə Gədəbəy rayonunun zəngin mədəni və tarixi irsinin daha geniş auditoriyaya tanıdılması, eyni zamanda bu irsin gələcək nəsillərə ötürülməsi başlıca məqsəddir. Xüsusi olaraq diqqətə çatdırıb ki, bu cür təşəbbüslər həm milli kimliyin qorunması baxımından mühüm əhəmiyyətə malikdir, həm də regionun turizm potensialının artırılmasına töhfə verir.

Təqdimatı keçirilən “Qaladan Qala – Gədəbəy: Tarixi Abidələr Diyarı” sənədli filmi Azərbaycanın qədim tarixinin izlərini özündə yaşadan Gədəbəy rayonunun zəngin mədəni irsini, arxeoloji və memarlıq abidələrini, folklor və etnoqrafik xüsusiyyətlərini tamaşaçılara tanıdır. Film, Azərbaycanın ən qədim yaşayış məskənlərindən biri olan Gədəbəydə yerləşən qala qalıqları, qədim körpülər, yaşayış məntəqələri, türbələr və daş abidələr vasitəsilə bölgənin tarixi yaddaşını canlandırır. Ekran əsəri, eyni zamanda, yalnız daş abidələrin təqdimatı ilə kifayətlənmir, eyni zamanda, aşıq sənəti, dastan və nağıl ənənəsi, həmçinin bölgədə yaşayan malakan icmasının gündəlik həyatı, məişəti və qəhrəmanlıq tarixi də filmdə xüsusi yer tutur.

Kamera qarşısında canlanan bu irs, sadəcə keçmişə bir nəzər deyil, həm də gələcəyə tutulan güzgüdür. Film, qədim oğuz türklərinin bölgədə qoyduğu izləri, sıldırım qayalar üzərində ucalan qalaların monumental gözəlliyini və bu irsin qorunmasının vacibliyini dolğun şəkildə əks etdirir. Film vasitəsilə tamaşaçılar təkcə daşlar və divarlar arasında səyahət etmir, həm də bir xalqın ruhuna, yaddaşına və milli kimliyinə doğru mənəvi bir yolçuluğa çıxırlar. Layihə mədəni irsin qorunması və bu irsin gələcək nəsillərə ötürülməsi baxımından mühüm bir sənədli töhfə hesab olunur.

Filmin nümayişindən sonra Media Təhlil Mərkəzinin audiovizual layihələr üzrə eksperti, telejurnalist Səidə İbrahimli filmin çəkilişi prosesindəki maraqlı məqamlardan söz açıb. Qeyd edib ki, belə filmlər vasitəsilə bölgələrin mədəni və tarixi potensialı daha geniş auditoriyaya çatdırılır. N.Tusi adına klinikanın direktoru Afət Məhəmmədli sağlamlıqla mədəni irs arasında əlaqədən bəhs edib. Vurğulayıb ki, cəmiyyətin sağlam inkişafı yalnız fiziki deyil, mənəvi sağlamlıqla da sıx bağlıdır və bu baxımdan mədəni irsin qorunması xüsusi əhəmiyyət daşıyır. Şair-publisist Etibar Nadiroğlu bölgəyə dair ədəbi-bədii duyğularını bölüşüb. O, Gədəbəyin təbiətindən, tarixindən və insanlarının ruhundan ilham alan poetik təəssüratlarını dinləyicilərlə paylaşıb. AMEA-nın əməkdaşı, tarix elmləri doktoru İlham Həsənov Gədəbəyin tarixi abidələrinin elmi dəyərləndirilməsindən söz açaraq qeyd edib ki, bölgədəki abidələr Azərbaycanın qədim dövlətçilik ənənələrinin sübutu kimi mühüm tədqiqat obyektləridir.
“İntellektual Hüquq Mərkəzi”nin direktoru, Dünya Türklərinin Koordinasiya Mərkəzinin rəhbəri, AYB üzvü, prezident təqaüdçüsü İlqar Türkoğlu türk dünyasının ortaq irsində Gədəbəyin rolunu vurğulayıb, belə layihələrin türk xalqları arasında tarixi bağların möhkəmlənməsinə töhfəsini qeyd edib.
AMEA Folklor İnstitutunun dosenti Aynur İbrahimova “Gədəbəy folklor mühiti: etnoqrafik zənginlik və milli düşüncə” mövzusunda çıxış edərək bölgənin elmi-folklor yaddaşını təqdim edib. Bildirib ki, Gədəbəyin ənənələri və etnoqrafik materialları Azərbaycan mədəni irsinin mühüm hissəsidir.

Prezident mükafatçısı, şair-publisist Aybəniz Qafarlı Gədəbəyin ədəbi-mədəni mühitinə dair fikirlərini bölüşüb. Vurğulayıb ki, bu torpaq təkcə təbiəti ilə deyil, yetirdiyi sənətkar və ziyalılarla da zəngindir. Dünya Gənc Türk Yazarlar Birliyinin sədri İntiqam Yaşar isə gənclərin yaradıcılığı və mədəni irsin təbliği istiqamətindəki təşəbbüslərin önəmini qeyd edib. Bildirib ki, yeni nəsillərin bu irsə sahiblənməsi milli kimliyimizin gələcəyi üçün mühüm şərtdir.

Digər çıxışlarda Gədəbəyin zəngin tarixi, mədəni və mənəvi irsi, bu irsin nəsillərarası ötürülməsi, sənədli filmin rolu və yaradıcı gənclərin dəstəklənməsi vurğulanıb.

Tədbirin bədii hissəsində qum rəssamı Lalə Hüseynzadənin və rəssam-ifaçı Emin Saqinin rəsmləri nümayiş olunub. Sonra Emin “Gədəbəy tarixi” mahnısını ifa edib.

İctimai birliyin sədri Y.Abdıyeva bu əməkdaşlığın gələcəkdə də davam etdirilməsinin vacibliyini vurğulayaraq filmin çəkilişləri zamanı yaradılan şəraitə görə Gədəbəy Rayon İcra Hakimiyyətinin başçısı Orxan Mürsəlova minnətdarlığını bildirərək ona təşəkkürnamə təqdim edib.

Təqdimat mərasimində Gədəbəy sakinləri, kənd icra nümayəndələri və müxtəlif peşə sahibləri ilə yanaşı, Bakıdan və Rusiyadan dəvət olunmuş qonaqlar iştirak ediblər.

Qeyd edək ki, çəkilişlər “AS Production” tərəfindən həyata keçirilib.



Zərifə BƏŞİRQIZI
XQ