Fransada kənd təsərrüfatı işçilərinin qəzəbi bütün ölkəni bürüyüb. Artıq neçə gündür ki, qəzəbli təsərrüfatçılar saman bağlamaları və traktorlarla ölkənin aparıcı yollarını blokadaya alıblar.

Turaztv.az AZƏRTAC-a istinadən xəbər verir ki, bu gün Fransanın cənub-qərbində, Pamiers kommunasında RD119 körpüsünün yaxınlığında yerli vaxtla səhər saat 05:15 radələrində bir sürücü avtomobili sürətlə təsərrüfatçıların üzərinə sürüb və nəticədə bir nəfər etirazçı ölüb, 2 nəfər isə ağır yaralanıb. Xəsarət alanların hamısı bir ailənin üzvüdür. Həlak olan fermer əri və qızı ilə təsərrüfatçıların nümayişinə qoşulmuş qadın olub. Avtomobildə isə üç nəfər erməni olduğu bildirilir. Yolun bağlı olmasına baxmayaraq, onlar avtomobillə bu yoldan keçmək üçün blokadanı yarmaq məqsədilə üzərinə sürüblər.

Bu barədə Fransa mətbuatında məlumat yayılıb.

“Üç üzvümüz ağır xəsarət aldı. Bir qadın öldü. Əri və qızı çətin vəziyyətdədirlər və təcili yardım xidmətinin himayəsindədirlər”,- deyə Kənd Təsərrüfatı Sahibkarları İttifaqları Milli Federasiyasının (FNSEA) prezidenti Arnaud Russo mətbuata bildirib. Hadisə yerinə fövqəladə hallar və təhlükəsizlik sisteminin nümayəndələri gəlib. 35 yanğınsöndürən, 13 polis əməkdaşı və 20 jandarm hadisə yerinə səfərbər olunub.

Bu qəza Fransada və bəzi Avropa ölkələrində fermerlərin narazılığının gücləndiyi bir vaxta təsadüf edir, yollarda getdikcə daha çox tıxaclar yaranır və şəhərlərə çoxlu sayda traktorlardan istifadə etməklə “ilbiz əməliyyatları” aparılır.

Həftə ərzində bir sıra aksiyalar elan olunub. Əməliyyat və nümayişlərin həftə sonuna kimi bütün ölkədə daha da güclənəcəyi gözlənilir.