Noyabrın 13-də gənclər və idman naziri Fərid Qayıbov Azərbaycan Badminton Federasiyasının fəaliyyəti ilə tanış olub.

Gənclər və İdman Nazirliyindən AZƏRTAC-a bildiriblər ki, badminton üzrə milli komandanın üzvləri ilə görüşən F.Qayıbov onların məşq proseslərini izləyib, yaradılmış şəraitlə maraqlanıb.

Azərbaycan Badminton Federasiyasının baş katibi Nəsimi Musayev nazirə federasiyanın fəaliyyəti, yarışlara hazırlıq, gənc idmançılarla işin qurulması, federasiyanın gələcək planları barədə məlumat verib. Qeyd olunan məsələlər ətrafında fikir mübadilələri aparılıb.
Görüşdə Federasiyanın vitse-prezidentləri Balakişi Qasımov, Mirzə Orucov, milli komandanın baş məşqçisi Morteza Validarvi iştirak ediblər.