Rusiyada türk serialları son zamanlar olduqca populyarlaşıb. Buna səbəb nədir?

Mədəniyyətşünas və ssenarist Ayşə Tuncar bunu izah edib.

Ekspertin fikrincə, hər şey "emosional dram", mədəni yaxınlıq və yüksək məhsul keyfiyyəti ilə bağlıdır.

"Türk serialları izləyicilərə güclü emosiyalar, eləcə də ailədaxili münaqişələr və dəyərlər təqdim edir ki, bu da bəzi yerlərdə rus tamaşaçılarına çox yaxşı təsir göstərir", - deyə o bildirib.

Tuncar qeyd edib ki, Qərb seriallarında fərdiyyətçilik və məsafə üstünlük təşkil edir. Türkiyə seriallarında isə səmimiyyət üstünlük təşkil edir ki, bu da onları rusiyalı tamaşaçılar üçün daha yaxın edir.

Xatırladaq ki, 2025-ci ilin mart ayında "Rusiya Veteranları" ictimai hərəkatı Rusiyada türk seriallarının yayımının qadağan edilməsi üçün aidiyyəti qurumlara müraciət edib. O dövrdə fəallar bu cür məzmunun ölkənin demoqrafik göstəricilərinə mənfi təsirini qeyd edirdilər.

Yeri gəlmişkən qeyd edək ki, Azərbaycanda da türk seriallarına maraq olduqca yüksəkdir. Bir sözlə, türk serialları demək olar ki, "sehirli bir tilsim" kimi dünyanı ağuşuna alıb. Statistikaya görə, Türkiyə serialları Yaxın Şərq və Latın Amerikası ilə yanaşı ABŞ, Avstraliya və Avropada da geniş tamaşaçı kütləsinə çatır. 200 ölkəyə ixrac edilərək dünyada 1 milyard tamaşaçıya çatan Türkiyə serialları 500 milyon dollardan çox gəlir gətirib.