Vəhdət Partiyasının şöbə müdiri İlham Şahverdiyev

Prezident İlham Əliyevin verdiyi müsahibə ölkəmizdə və regionda baş verən proseslərə aydın baxış ortaya qoyur. Əminliklə demək olar ki, bu müsahibə Azərbaycanın bu gün harada olduğunu və hara doğru getdiyini aydın şəkildə göstərir.

Prezident həm daxili, həm də xarici siyasətlə bağlı mühüm məsələlərə toxunaraq görülən işlər və qarşıda duran məqsədlər haqqında ətraflı məlumat verdi.

Qürurverici haldır ki, Prezident İlham Əliyevin apardığı siyasət beynəlxalq aləmdə də müsbət qiymətləndirilir. Bir çox ölkələrin dövlət başçıları və siyasi dairələri Azərbaycanın balanslı və düşünülmüş siyasətini təqdir edirlər.

Azərbaycan heç bir tərəfin maraqlarına alət olmadan, yalnız öz milli maraqlarına əsaslanan siyasət yürüdür. Bu yanaşma ölkəmizi etibarlı tərəfdaş kimi tanıdır.

Müsahibədə iqtisadi məsələlərə xüsusi yer ayrılıb. Prezident bildirib ki, Azərbaycanın maliyyə ehtiyatları xarici borcumuzdan dəfələrlə çoxdur. Xarici borcun ÜDM-də payı isə tarixdə ən aşağı səviyyədədir.

Bu, ölkəmizin iqtisadi baxımdan tam müstəqil olduğunu göstərir. Dövlət sosial sahəyə, müdafiəyə və Qarabağın bərpasına ayrılan vəsaiti azaltmır. Əksinə, bu sahələr daim diqqət mərkəzində saxlanılır.

Prezident müsahibəsində hərbi məsələlərə də toxunub. O qeyd edib ki, Azərbaycanın müdafiə qabiliyyəti ildən-ilə gücləndirilir, yerli hərbi sənaye inkişaf edir və ordumuz müasir texnika ilə təmin olunur. Bu isə ölkəmizin təhlükəsizliyinin etibarlı şəkildə qorunmasına xidmət edir.

Xarici siyasət sahəsində əsas mövzulardan biri də sülh məsələsi olub. Azərbaycan və Ermənistan arasında ABŞ-da əldə olunmuş razılaşma Cənubi Qafqazda uzunmüddətli sülhün və sabitliyin təmin olunmasına töhfə verir.

Ümumilikdə, Prezident İlham Əliyevin müsahibəsi göstərir ki, Azərbaycan güclü, müstəqil və gələcəyə inamla baxan dövlətdir. Aparılan siyasət ölkənin inkişafına, xalqın rifahına və regionda sabitliyin möhkəmlənməsinə xidmət edir.