6 fevral 2023-cü ildə Türkiyədə baş verən zəlzələ ağrılarını çoxumuz təəssüf hissilə qələmə aldıq. Çağdaş Azərbaycan poeziyasının görkəmli nümayəndəsi şair-publisist Əli Rza Xələfli də bu faciəni öz ürək ağrıları ilə qələmə alıb kağıza köçürüb. Tanınmış publisistin rəhbərlik etdiyi "KREDO" qəzetinin 10 mart 2023-cü il tarixli sayında çap olunan "Türkiyənin zəlzələ ağrıları" başlıqlı poemasını oxudum. Poema bu misra ilə başlayır:
Qürurundan enmə sən, əyilmə sən, Sultanım,
İncimə hər kimsədən, öyülməsən, Sultanım...
Şair bununla Türk dünyasının lideri Rəcəb Təyyub Ərdoğana təsəlli verir, bildirir ki, heç vaxt əyilmə, başını dik tut, düşmənlərimiz baxıb sevinməsin.
Qardaş Türkiyənin ağrı-acıları həm də Azərbaycanın qəmi-kədəridir. Bu acı xəbəri eşidən kimi Azərbaycan Pezidenti İlham Əliyev cənablarının sərəncamı ilə ilk xilasedicilər zəlzələ bölgəsinə göndərildi. Bu, qardaş ölkədə çox yüksək səviyyədə qarşılandı. Ancaq Türk qardaşlarımıza içimizdən keçən təskinliyi çatdıra bilmirdik. Yalnız onu fikirləşirdik ki, görəsən bu qədər ağrıların altından Türkiyə qalxıb dikələ biləcəkmi?
Əli Rza Xələfli qələmə aldığı poemada qardaş ölkənin liderinin və bütünlükdə Türk xalqının ağrı-acısını özü yaşayır. O, çalışır ki, içinin təpəri ilə ehtiva etdiyi bu kiçik əsərlə Türkiyəyə bir təskinlik versin.
Şair yazır:
Qətiyyətin yol açır Türkün Tanrı dağına,
İradən işıq saçar Turanın bayrağına...
Əli Rza Xələfli bu misralarda Türk dünyasını əlçatmaz bir dağa bənzədir və bildirir ki, Turanın qurucusu siz olacaqsınız, o bayrağı Turan dövlətlərində dalğalandıracaqsınız.
Şair "Turan sevdalıları"nın obrazını Azərbaycanın simasında ümumiləşdirib, Azərbaycan-Türkiyə münasibətlərini "bir millət, iki dövlət" amalında verib, bütün türk dövlətlərinin birliyini qələmə alıb.
Əli Rza Xələfli poemanı o qədər ürək ağrısı ilə yazıb ki, əsəri oxuduqca o zəlzələ ağrılarını sanki özün yaşayırsan. Dağıntılar altından çıxarılan hər bir uşağın, qocanın fəryadını öz içində yaşadırsan.
Poemanı oxuduqca göz yaşlarına hakim ola bilmirsən. Şairin aşağıdakı misraları da elə bu qəbildəndir:
Səninlə bir gedirik tarixin sabahına,
Səninlə bir yanırıq Türkiyənin ahına...
Səni sevən hər kəsi qardaş bildim, Sultanım.
Könlümün dünyasına sirdaş bildim, Sultanım.
Şair bu misralarında Türkiyə liderinin böyük, türk dünyasının əvəzolunmaz siyasətçisi olduğunu bildirib. Belə götürəndə, "Türkiyənin zəlzələ ağrıları" poeması qardaş ölkənin dərdinə şərik olmaq məqsədi ilə qələmə alınıb, müəllif öz ürək ağrılarını Türk xalqının yenilməzliyi fonunda qabardıb.
Poema bu sonluqla bitir. Oxucuda bir mübarizlik hissi aşılayır. Açığı, Əli Rza Xələflini bizə sevdirən cəhət də elə budur: O, ağrını ağrı kimi (cismani sıxıntı kimi) yox, kişilik, mübarizlik, cəsarət hissi kimi mənalandırır.
Düşünürük ki, Əli Rza Xələflinin "Türkiyənin zəlzələ ağrıları" poeması hər kəsin yüksək dəyər verəcəyi bir əsər kimi tarixdə yer tutacaq.

Hüseyn İsaoğlu ( Məmmədov ) Yazıçı - publisist
Azərbaycan Jurnalistləri Birliyinin üzvü.