İqtisadçı alimlər: Qarabağın iqtisadiyyatı müasir tələblər səviyyəsində yenidən qurulacaq
AMEA-nın İqtisadiyyat İnstitutunda 8 Noyabr - Zəfər Gününə həsr edilən onlayn tədbir keçirilib.
Turaztv.az xəbər verir: Bu barədə AZƏRTAC-a İqtisadiyyat İnstitutdan məlumat verilib. Tədbiri açan institutun baş direktoru professor Nazim Müzəffərli Müzəffər Ali Baş Komandan İlham Əliyevin rəhbərliyi, rəşadətli Azərbaycan Ordusunun qəhrəmanlığı və xalqımızın birliyi sayəsində Qarabağ uğrunda 44 günlük Vətən müharibəsində qazanılan möhtəşəm və tarixi Qələbədən danışıb. Bildirib ki, ötən dövrdə Prezident İlham Əliyevin rəhbərliyi və qətiyyəti ilə Azərbaycan güclü ordu və iqtisadiyyat qurmaqla, düşünülmüş uğurlu daxili və xarici siyasət yürütməklə addım-addım bu qələbəyə doğru irəliləyib: “44 günlük Vətən müharibəsinin hər günü kədər qarışıq sevinclə dolu idi. Şəhidlərimizin cənazələri gəlirdi, amma bununla belə bilirdik ki, qələbəyə doğru bir addım da irəliləmişik. Hər gün ərazilərimizin işğaldan azad olunması ilə bağlı xoş xəbərlər alırdıq. Şuşanın işğaldan azad olunması isə möhtəşəm bir gün, hadisə idi. Əsgərlərimiz şücaət göstərdilər, dünya hərb tarixinə yeni səhifə yazdılar və bizə qürurlu, şərəfli günlər yaşatdılar”.
Nazim Müzəffərli vurğulayıb ki, hazırda Qarabağ çox sürətlə bərpa olunur, yenidən qurulur. Dünyanın heç bir yerində heç vaxt öz vəsaiti ilə bu sürətlə və bu səviyyədə postkonflikt ərazi bərpa olunmayıb. Bu da inanılmaz bir gerçəklikdir. Azərbaycan Prezidentinin rəhbərliyi ilə Qarabağ böyük həvəslə, şövqlə yenidən qurulur. Tezliklə insanlar öz yurd-yuvalarına, evlərinə qayıdacaqlar və biz orada əbədi yaşayacağıq.
Professorlar Gülşən Yüzbaşıyeva, Tərbiz Əliyev, Rəna Sultanova, dosentlər Rəsmiyyə Abdullayeva, Samirə Abbasova, Nəsimi Əhmədov və digərləri 44 günlük Vətən müharibəsindən, Müzəffər Ali Baş Komandanın qətiyyətli addımlarından, uzaqgörən siyasətindən, Xalq-Prezident birliyindən, “Dəmir yumruq” əməliyyatından, tarixi Qələbəyə aparan yoldan danışıblar. Azərbaycan əsgərinin qəhrəmanlıqları, həmin günlərdə xalqımızın birliyi, hamının cəbhə üçün əlindən gələn köməyi göstərdiyi qeyd olunub, qalib xalqın nümayəndəsi kimi keçirdikləri qürur hisslərini bölüşüblər. Erməni işğalçılarının Qarabağda törətdikləri vandalizmdən və dağıntılardan danışıblar. Əminliklə vurğulayıblar ki, Prezidentin rəhbərliyi ilə uğurla həyata keçirilən böyük bərpa işləri nəticəsində tezliklə Qarabağda həyat yenidən canlanacaq. Qarabağın iqtisadiyyatı da elmi əsaslar üzərində ən müasir tələblər səviyyəsində tamamilə yenidən qurulacaq, inkişaf yoluna qədəm qoyacaq. Bu işdə Azərbaycan iqtisadçıları öhdələrinə düşən vəzifələri layiqincə yerinə yetirmək əzmindədirlər.
Son xəbərlər
Ən çox oxunanlar
- Bu gün
- Bu həftə
- Bu ay